mausam-e-abr ho suboo bhee ho

mausam-e-abr ho suboo bhee ho
gul ho gulshan ho aur too bhee ho

kab tak aa'ine kaa ye husn-e-qubool
mooNh teraa is taraf kabhoo bhee ho

ho jo teraa saa rang gul kaa hai
dekheN ham tab jab aisii boo bhee ho

hai garz ishq sirf hee lekin
shart ye hai ke justujoo bhee ho

sarkashee gul kee sar naheeN aatee
naaz karne ko waisaa roo bhee ho

kis ko bulbul hai dam-kashee kaa dimaaG
ho to gul hee kee guftugoo bhee ho

dil tamanna-kadaa to hai par "Meer"
ho to us kee hee aarzoo bhee ho