maanind-e-sham'a majlis-e-shab

maanind-e-sham'a majlis-e-shab ashkabaar paayaa
al qissaa "Meer" ko hamne be iKHtiyaar paayaa
[maanind-e-sham'a = like a lamp]
[majlis-e-shab = an evening party]
[ashkabaar = tearful]
[al qissaa = briefly] [be iKHtiyaar = helpless]

shahar-e-dil ek muddat ujRaa basaa GamoN meiN
aaKHir ujaaR denaa uskaa qaraar paayaa
[qaraar = decision/verdict]

itnaa na dil se milte na dil ko kho ke rahate
jaisaa kiyaa thaa hamne vaisaa hee yaar paayaa

kyaa a'itbaar yaaN kaa phir usko KHvaar dekhaa
jisne jahaaN meiN aakar kuchh a'itbaar paayaa
[KHvaar = wretched]

aahoN ke sh'ole jis jaa uThe haiN "Meer" se shab
vaaN jaa ke subaH dekhaa musht-e-Gubaar paayaa
[musht-e-Gubaar = handful of dust]