jis sar ko Guroor aaj hai

jis sar ko Guroor aaj hai yaaN taaj-wari kaa
kal us pe yaheeN shor hai phir noha-gari kaa

aafaaq ki manzil se gayaa koun salaamat
asbaab luTaa raah meN yaaN har safari kaa

zindaaN meN bhi shorash na gayi apne junooN ki
ab sang madaawa hai is ashufta-sari kaa

har zaKHm-e-jigar daawar-e-maHshar se hamaaraa
insaaf talab hai teri be-daad-gari kaa

apnee to jahaaN aaNkh laRee phir waheeN dekho
a'ine ko lapkaa hai pareshaaN-nazari kaa

sad mousam-e-gul ham ko tah-e-baal hee guzare
maqdoor na dekhaa kabhoo be-baal-o-pari ka

us ke rang se jhamke hai palak par kah kahe to
TukRaa hai mera ashk aqeeq-e-jigari kaa

kal sair kiyaa hamne samandar ko bhee jaa kar
thaa dast-e-nagar panja-e-mushrikaaN ki tari kaa

le saaNs bhee ahistaa ke naazuk hai bahut kaam
aafaaq kee is kargah-e-sheesha-gari kaa

Tuk "Meer" jigar soKHta kee jald KHabar le
kyaa yaar bharosaa hai chiraaG-e-sahari ka