jeete-jee kuchaa-e-dildaar se

jeete-jee kuchaa-e-dildaar se jaayaa na gayaa
uskee deevaar kaa sar se mere saayaa na gayaa
[kuchaa-e-dildaar = lover's lane]

dil ke ta'iN aatish-e-hijraaN se bachaayaa na gayaa
ghar jalaa saamne par hamse bujhaayaa na gayaa
[dil ke ta'iN = the heart]
[aatish-e-hijraaN = pangs of separation]

kyaa tunak hauslaa the deedaa-o-dil apne aah
ek dam raaz moHabbat kaa chhupaayaa na gayaa
[tunak hauslaa = impatient]
[deedaa-o-dil = eyes and heart]

dil jo deedaar kaa qa'el ki bohot bhuukaa thaa
is sitam-kushtaa se yak zaKHm bhee khaayaa na gayaa
[sitam-kushtaa = oppressed/tortured]

shahar-e-dil aah 'ajab ja'e thee par uske ga'e
aisaa ujRaa ki kisee taraH basaayaa na gayaa
[ja'e = place]